WATOTO WANAWEZA KUATHIRIWA NA MATATIZO YA KIFAMILIA HATA KAMA HAWAELEWI CHANZO

 

Emakulata Msafiri

Mwanakwetukids

Alianza Kuogopa Barua Zilizokuwa Zikifika Nyumbani

Kila barua iliyowekwa kwenye sanduku la posta la nyumba yao ilimfanya Tino ahisi hofu. Tangu baba yake aanze kupokea simu nyingi kutoka kwa watu aliowadai fedha mazingira ya nyumbani yalikuwa yamebadilika. Wazazi wake walizungumza kwa sauti za chini na wakati mwingine baba yake alikaa sebuleni kwa muda mrefu akiwa kimya.

Tino alikuwa na miaka kumi na moja na akisoma darasa la tano. Hakuwa akielewa vizuri matatizo yaliyokuwa yakiikabili familia yao lakini alitambua kuwa mambo hayakuwa kama zamani. Baba yake ambaye hapo awali alikuwa mchangamfu na mwenye utani alikuwa ameanza kukasirika kwa mambo madogo.

Siku moja alipokuwa akirudi kutoka shule Tino alikuta bahasha ikiwa imewekwa kwenye mlango wa nyumba yao. Alipoiona ikiwa na jina la baba yake aliiokota na kuiweka ndani ya begi lake. Aliogopa kwamba kuwasili kwa barua nyingine kungeleta mabishano mapya nyumbani.

Usiku huo baba yake aliuliza kama kuna barua iliyofika. Tino alikanusha lakini alishindwa kupata usingizi kwa sababu alijua kuwa alikuwa ameficha kitu ambacho hakikuwa chake.

Asubuhi iliyofuata aliitoa bahasha kwenye begi lake na kumkabidhi mama yake. Mama yake alipomwuliza kwa nini aliificha Tino alianza kulia na kueleza kuwa alikuwa akiogopa kuona familia yao ikiendelea kuwa na huzuni.

Mama yake alimkumbatia na kumweleza kuwa matatizo ya kifedha yalikuwa jukumu la watu wazima kuyashughulikia. Hakupaswa kuficha barua wala kujaribu kutatua matatizo ambayo hakuwa na uwezo wa kuyatatua.

Baadaye wazazi wake walikaa pamoja na kuzungumza naye kwa uwazi unaolingana na umri wake. Walimweleza kuwa walikuwa wakipitia changamoto lakini walikuwa wakitafuta njia za kuzitatua.

Kwa mara ya kwanza baada ya muda mrefu Tino alijisikia huru kueleza hofu yake bila kuogopa kulaumiwa. Alielewa kuwa hakulazimika kubeba wasiwasi wote peke yake.

 

emakulatemsafiri@gmail.com

0653903872