FURAHA YA MCHEZO, MACHOZI YA MATOKEO

Emakulata Msafiri

Mwanakwetukids

Kwa wiki kadhaa Kelvin alikuwa akichelewa kurudi nyumbani baada ya shule. Mama yake alipomuuliza sababu alidai kuwa alikuwa akisoma na marafiki zake. Ukweli ni kwamba alikuwa akitumia muda mwingi kucheza michezo ya kompyuta kwenye duka lililokuwa karibu na shule.

Kadiri siku zilivyopita Kelvin alianza kutumia fedha za chakula kucheza michezo na kupuuza kazi za shule. Siku moja mwalimu alimwonya kwa kutowasilisha kazi alizopewa.

Jioni moja alipofika nyumbani alimkuta mama yake akiwa amekaa sebuleni akimsubiri. Alikuwa amepigiwa simu na mwalimu kuhusu maendeleo ya mwanawe. Kelvin alipojaribu kutoa sababu nyingine mama yake alimwomba aseme ukweli.

Mama yake alimweleza kuwa kucheza si kosa lakini kupuuza masomo na kusema uongo ndio kosa na linaleta  matatizo. Kelvin alijutia tabia yake na kuahidi kubadilika.

Katika siku zilizofuata Kelvin alianza kukamilisha kazi zake na kurudi nyumbani kwa wakati. Aligundua kuwa angeweza kufurahia michezo bila kuharibu masomo yake.

 

 

emakulatemsafiri@gmail.com

0653903872