SIKU YA VIBANDA INAHITIMISHWA

 

Adeladius Makwega – MBAGALA

 

“Kila Sabato yangu huwa nasali Kanisa la Waadventista Wasabato Ipagala. Lakini kwa Sabato ya Septemba 5, pamoja na mwendo wa juma zima, nimekuwa nikisali katika Kanisa la Wasabato Ilazo kwa sababu tuko huko kwenye makambi. Kila Jumamosi tunaingia ibadani kuanzia saa 2:00 asubuhi hadi saa 12:00 jioni. Kwa sasa ni siku za vibanda.”

Hayo ni maneno ya Joseph Masota Ndaro, Mkuu wa Sehemu ya Huduma za Masjala za Marais katika Ofisi ya Rais, Idara ya Kumbukumbu na Nyaraka za Taifa nchini Tanzania, alipokutana na Mwanakwetu jijini Dodoma.

 

Kwa waumini wa Waadventista Wasabato, Jumamosi si siku ya kawaida. Ni siku maalumu ya ibada, utulivu, ushirika, kujifunza Neno la Mungu na kujenga upya uhusiano wa mtu na Muumba wake.

Katika siku hii ya Ijumaa, Septemba 4, 2026, Mwanakwetu alifanya mazungumzo mafupi na waumini wa Kanisa la Waadventista Wasabato, akiwamo Ndugu Ndaro, ambaye alieleza namna ambavyo kipindi hiki cha makambi kinavyobadili ratiba ya kawaida ya waumini.

 

“Tuko Kambini”

 

Ndugu Ndaro anaeleza kuwa kwa kipindi hiki, yeye na waumini wengine wameamua kushiriki ibada katika Kanisa la Wasabato Ilazo kutokana na shughuli za makambi zinazoendelea.

 

Kwao, siku hizi si tu muda wa kubadili mahali pa ibada, bali pia ni kipindi cha kujifunza, kushirikiana, kuimarisha imani na kuishi kwa karibu zaidi kama familia ya waamini.

 

Katika mazingira ya makambi, waumini hukutana kwa siku kadhaa, wakishiriki ibada, mafundisho, maombi na shughuli mbalimbali zinazolenga kuimarisha maisha yao ya kiroho na kijamii.

 

Ndugu Ndaro, ambaye taaluma yake ya awali ni mwalimu wa sekondari, alifafanua kwa mtazamo wake maana ya siku za vibanda au makambi katika utamaduni wa Waadventista.

“Makanisa ya Kiadventista yana utamaduni wa makambi ya kila mwaka ambapo waumini tunakusanyika na kuishi kwenye mahema au kambi kwa siku kadhaa. Kukumbuka baraka: hali hii hubeba mwelekeo wa shukrani kwa mavuno na umoja, sawa na kusudi la kijamii la Sikukuu ya Vibanda ya kiasili.”

 

Maelezo hayo yanaonesha kwamba makambi si suala la kukusanyika mahali pamoja pekee. Kwa waumini wengi, ni nafasi ya kutafakari maisha, kushukuru kwa baraka, kujifunza, kuomba, kusikiliza mafundisho na kujenga mshikamano wa kijamii.

 

Katika maisha ya kila siku yenye pilikapilika, majukumu ya kazi na changamoto mbalimbali, Sabato huja kama nafasi ya kipekee ya waamini kusimama kidogo, kutafakari na kuelekeza mawazo yao kwa Mungu.

“Kwa hiyo, kwa Mwadventista Msabato, kufika ibadani si utaratibu wa kawaida tu. Ni sehemu ya maisha ya imani.”

Na pale Sabato inapokutana na kipindi cha makambi, hali hiyo huongeza fursa ya waumini kukaa pamoja kwa muda mrefu zaidi, kusali, kujifunza na kushirikiana.

 

Mazungumzo haya yana kumbukumbu nyingine ya kipekee.

Ndugu Ndaro aliwahi kumfundisha Mwanakwetu katika masomo  kadhaa ya kidato cha kwanza, cha pili hadi cha tatu jijini Dar es Salaam kati ya mwaka 1991 na 1993.

Miaka imepita, maisha yamebadilika, kila mmoja amepitia safari yake ya kielimu na kikazi; lakini kukutana tena kupitia mazungumzo kuhusu imani, Sabato na maisha ya kila siku kumekuwa kama kufungua ukurasa wa kumbukumbu za zamani.

 

Ni kumbukumbu inayotukumbusha kwamba walimu hawafundishi darasani pekee; mara nyingi huacha alama katika maisha ya wanafunzi wao kwa miaka mingi.

“Kwa Waadventista Wasabato wanaoshiriki makambi haya, ujumbe mkubwa ni ule wa imani, umoja, shukrani na kumkaribia Mungu.”

 

Mwalimu Ndaro alisema.

 

Ni siku ya kuacha kwa muda pilikapilika za dunia na kutenga muda kwa ajili ya ibada na ushirika.

Kutoka Ipagala hadi Ilazo, kutoka darasani mwaka 1991 hadi kukutana tena mwaka 2026, simulizi hii inabeba jambo moja kubwa:

“Maisha yanaweza kututenganisha kwa miaka, lakini imani, kumbukumbu na urafiki vinaweza kutukutanisha tena katika mazingira tusiyoyatarajia.”

 

Katika kutayarisha makala haya Mwanakwetu alimtafuta Bi Happines Masija ambaye na yeye ni Msabato ambaye ni Afisa Utumishi Mkuu Ofisi ya Rais Idara ile ya Kumbukumbu na Nyaraka na yeye aliyasema haya.

 

“Kwa waumini wote wa Kanisa la Waadventista Wasabato wanaoshiriki Sabato hii na siku za makambi, tunawatakia:Bwana awabariki, awalinde na kuwaimarisha katika imani, upendo na umoja.”

Nawatakia sabato njema.

📧 makwadeladius@gmail.com

📞 0717 649 257