Adeladius Makwega-
Ofisi ya Rais Idara ya Kumbukumbu na Nyaraka za Taifa DODOMA.
Kuna vitu ambavyo thamani yake haiwezi kupimwa kwa fedha. Vipo kwenye karatasi zilizohifadhiwa kwa uangalifu, mafaili yaliyopangwa kwa utaratibu, picha zinazobeba historia na taarifa ambazo, hata baada ya miongo kadhaa kupita, bado zina uwezo wa kusimulia safari ya Taifa.
Hizo ndizo nyaraka za Taifa.
Ni kumbukumbu za maamuzi, matukio, mipango, sera na shughuli mbalimbali zilizolisaidia Taifa kujenga lilipo leo. Ndani yake kuna historia ambayo haiwezi kurudiwa na taarifa ambazo, zikizotea, ni sehemu ya urithi wa Taifa inayoweza kupotea milele.
Kwa kutambua umuhimu huo, Mkurugenzi wa Idara ya Kumbukumbu na Nyaraka za Taifa, Ndugu Firimin Msiangi, Septemba 10. 2026 amefanya kikao kazi na Wakuu wa Idara na Vitengo, kwa lengo la kuimarisha utekelezaji wa majukumu ya Idara na kusukuma mbele dira yake ya
“Kuwa na uhifadhi bora wa Nyaraka za Taifa.”
Kikao hicho hakikuwa tu mkutano wa kawaida wa watendaji. Kilikuwa ni sehemu ya safari ya kuhakikisha kuwa kila nyaraka yenye thamani kwa Serikali na Taifa inalindwa, inatunzwa na inapatikana pale inapohitajika.
Katika zama ambazo teknolojia imebadilisha namna taarifa zinavyotengenezwa, kutunzwa na kutumika, uhifadhi wa nyaraka hauwezi kubaki katika mfumo wa zamani pekee.
Ndugu Msiangi amesisitiza umuhimu wa kutumia teknolojia katika usimamizi na uhifadhi wa nyaraka, ikiwemo kuharakisha mchakato wa uwekaji wa nyaraka katika mifumo ya kidijitali (digitization).
Hatua hii inalenga kufanya taarifa zipatikane kwa urahisi zaidi, kupunguza utegemezi wa nyaraka za karatasi na kuongeza ulinzi wa taarifa dhidi ya hatari zinazoweza kusababisha nyaraka kupotea au kuharibika.
Lakini nyuma ya kila mfumo wa kidijitali kuna swali muhimu: Je, taarifa hizo ziko salama?
Swali hili lilijibiwa na ndugu Msiangi akisema;
“Ndiyo maana suala la usalama na nakala rudufu (backup) limepewa uzito. Nyaraka za kidijitali zinahitaji kulindwa kwa mifumo madhubuti ili kuhakikisha kuwa taarifa muhimu haziwezi kupotea kutokana na hitilafu za mifumo, majanga au changamoto nyingine za kiteknolojia.”
Katika kikao hicho, msisitizo umewekwa pia katika kuhakikisha kuwa nyaraka zinapokelewa, zinapangwa, zinahifadhiwa na kutolewa kwa kufuata taratibu zinazotambulika. Hii ina maana kwamba safari ya nyaraka haianzi pale inapowekwa kwenye kabati au ghala.
“Huanzia kwenye usimamizi wake sahihi tangu inapozalishwa, ikiendelea kwenye upangaji, uhifadhi, ulinzi na hatimaye upatikanaji wake pale inapohitajika.”
Ndugu Msiangi alipigilia msumari wa dira ya taasisi hii akisema,
“Kwa mtazamo huo, uhifadhi bora si suala la kuwa na majengo pekee, bali ni kuwa na mfumo madhubuti unaounganisha watu, teknolojia, miundombinu, sheria, kanuni na taratibu. Nyaraka zinaweza kuwa na thamani kubwa, lakini bila mazingira sahihi ya kuzihifadhi, thamani hiyo inaweza kuwa hatarini.”
Kikao hicho kimeangazia umuhimu wa kuboresha miundombinu ya uhifadhi pamoja na kuimarisha usalama wa nyaraka. Sambamba na hilo, kuna umuhimu wa kuwajengea uwezo watumishi kupitia mafunzo na ujuzi unaoendana na mabadiliko ya teknolojia na mahitaji ya kisasa ya usimamizi wa kumbukumbu. Kwa maana hiyo, mtumishi mwenye weledi ni sehemu muhimu ya ulinzi wa historia ya Taifa.
Dira ya “Kuwa na uhifadhi bora wa Nyaraka za Taifa” si kauli ya kawaida ndugu Msiangi alisema bal.i
“Ni wito wa kuhakikisha kwamba historia ya Taifa inalindwa kwa viwango vinavyostahili.Ni kuhakikisha kwamba nyaraka ambazo leo zinaonekana kuwa ni mafaili, karatasi au taarifa za kawaida, kesho zinabaki kuwa ushahidi muhimu kwa Serikali, watafiti, wanahistoria na vizazi vijavyo.”
Ndiyo maana Msiangi amesisitiza pia umuhimu wa kufanya ufuatiliaji na tathmini ya mara kwa mara, ili kubaini changamoto mapema, kupima utekelezaji na kuchukua hatua za maboresho.
Hatimaye, uhifadhi wa nyaraka ni zaidi ya kutunza karatasi. Ni kulinda kumbukumbu za Taifa.
Ni kuhakikisha kwamba maamuzi ya jana yanaweza kueleweka leo. Ni kuwezesha Serikali kupata taarifa sahihi inapohitajika. Ni kuhifadhi ushahidi wa safari ya Taifa. Na zaidi ya yote, ni kuhakikisha kuwa vizazi vijavyo havikui bila kujua vilikotoka.
Kwa mtazamo huo haya yanafikiwa kama mfumo unaotumia teknolojia kwa kiwango cha juu, miundombinu bora, watumishi wenye weledi, mifumo madhubuti ya usalama na usimamizi bora wa rasilimali za taasisi.
Kwa sababu Taifa lisilolinda kumbukumbu zake linahatarisha sehemu ya historia yake. Lakini Taifa linalohifadhi nyaraka zake vizuri, linaweka historia yake salama, linaimarisha utawala wa sasa na linaacha urithi kwa kizazi kijacho.
Na hapo ndipo maana halisi ya dira ya Idara inaposema:
“KUWA NA UHIFADHI BORA WA NYARAKA ZA TAIFA.”
Nakutakia Siku njema.
makwadeladius @gmail.com
0717649257
Post a Comment