DALILI ZINAZOONESHA MTOTO WAKO ANAKUA VIZURI

Emakulata Msafiri 

Mwanakwetukids

Kila mzazi hutamani kuona mtoto wake akikua akiwa na afya njema. Ingawa kila mtoto hukua kwa kasi yake kuna dalili muhimu zinazoweza kuonesha kuwa ukuaji wake unaendelea vizuri.

Moja ya dalili hizo ni kuongezeka kwa uzito na urefu kulingana na umri wake. Wataalamu wa afya hufuatilia maendeleo haya kupitia vipimo vya kliniki ili kuhakikisha mtoto anakua kwa kiwango kinachotarajiwa.

Pia mtoto anayekua vizuri hufikia hatua mbalimbali za ukuaji kwa wakati wake. Kwa mfano huanza kutabasamu, kukaa, kutambaa, kusimama na hatimaye kutembea. Ni kawaida watoto kutofikia hatua hizi kwa siku au mwezi uleule lakini kuchelewa sana kunaweza kuhitaji ushauri wa mtaalamu wa afya.

Dalili nyingine ni kuwa na hamu ya kula na kucheza. Mtoto mwenye afya mara nyingi hupenda kushiriki michezo, kujifunza vitu vipya na kuonesha udadisi kuhusu mazingira yanayomzunguka.

Aidha mtoto anayelala vizuri na kuamka akiwa mchangamfu mara nyingi huwa katika hali nzuri ya afya. Usingizi wa kutosha huchangia ukuaji wa mwili na ubongo.

Wazazi wanapaswa pia kuzingatia ratiba ya chanjo na kuhudhuria kliniki za watoto mara kwa mara. Hii husaidia kufuatilia ukuaji wa mtoto na kugundua changamoto zozote mapema.

Kila mtoto ni wa kipekee hivyo usimlinganishe sana na watoto wengine. Kilicho muhimu ni kuhakikisha anapata lishe bora, usingizi wa kutosha, chanjo zote zinazohitajika, upendo na malezi mazuri.

emakulatemsafiri@gmail.com 

0653903872