Na Mwanakwetu Kids
Zaidi ya wanafunzi milioni 3.2 nchini Ufilipino wameathirika kufuatia tetemeko kubwa la ardhi lenye ukubwa wa 7.8 kutokea katika eneo la Mindanao siku ya kwanza ya muhula mpya wa masomo. Tukio hilo limesababisha shule nyingi kufungwa kwa muda huku shughuli za masomo zikisitishwa katika maeneo mbalimbali yaliyoathirika.
Kwa mujibu wa Waziri wa Elimu wa Ufilipino Sonny Angara tetemeko hilo limesababisha uharibifu wa baadhi ya majengo ya shule na hivyo kulazimu mamlaka kusitisha masomo hadi ukaguzi wa usalama utakapokamilika. Alisema hatua hiyo imechukuliwa ili kuhakikisha usalama wa wanafunzi na walimu.
Mashuhuda wa tukio hilo walisema wanafunzi wengi walitoka madarasani kwa haraka baada ya kuhisi mtikisiko mkubwa wa ardhi. Walimu waliwaelekeza wanafunzi kwenda katika maeneo salama huku wakifuata taratibu za dharura zilizowekwa kwa ajili ya majanga kama hayo.
Serikali ya Ufilipino imeanza kufanya tathmini ya kiwango cha uharibifu uliosababishwa na tetemeko hilo katika shule na miundombinu mingine ya umma. Rais wa nchi hiyo Ferdinand Marcos Jr amezitaka taasisi zinazohusika na usimamizi wa majanga kuhakikisha misaada inawafikia waathirika kwa wakati.
Wakati huo huo mashirika mbalimbali ya misaada yanaendelea kutoa huduma muhimu kwa familia zilizoathirika ikiwemo vifaa vya kujifunzia na huduma za ushauri nasaha kwa wanafunzi. Serikali imeeleza kuwa itaendelea kufuatilia hali hiyo na kuchukua hatua zinazohitajika ili wanafunzi warejee masomoni kwa usalama.
Post a Comment