Emakulata Msafiri
Mwanakwetukids.com
Mtoto ni sehemu muhimu ya familia na jamii. Ili akue akiwa mtu mwenye nidhamu na uwajibikaji ni muhimu aanze kujifunza kazi za nyumbani mapema. Kujifunza kazi hakumaanishi kumtesa mtoto bali kumfundisha stadi za maisha ambazo zitamsaidia baadaye.
Mtoto anaweza kuanza kujifunza kazi ndogo ndogo kuanzia akiwa na umri wa miaka miwili au mitatu. Katika umri huu anaweza kufundishwa kuokota na kupanga vinyago vyake baada ya kucheza. Anapokua zaidi anaweza kusaidia kazi rahisi kama kufuta meza, kupanga nguo na kutandika kitanda chake.
Kujifunza kazi kuna faida nyingi. Kwanza humjengea mtoto tabia ya uwajibikaji na kujitegemea. Pia humfundisha kuheshimu kazi na kuwathamini watu wanaofanya kazi mbalimbali. Lakini pia humsaidia kukuza ushirikiano na upendo ndani ya familia kwa kushiriki majukumu ya nyumbani.
Hata hivyo kazi anazopewa mtoto zinapaswa kuendana na umri na uwezo wake. Wazazi na walezi wanapaswa kuhakikisha kuwa kazi hizo hazihatarishi afya yake wala kuathiri masomo yake. Pia wanapaswa kumwongoza na kumtia moyo ili afurahie kujifunza.
Mtoto anaweza kuanza kujifunza kazi za nyumbani tangu akiwa mdogo kwa kufanya kazi zinazolingana na umri wake. Hii humsaidia kukua akiwa mtu mwenye nidhamu, uwajibikaji na uwezo wa kujitegemea katika maisha yake ya baadaye.
emakulatemsafiri@gmail.com
0653903872
Post a Comment