FURAHA NI ZAIDI YA KUPATA ZAWADI

 

Emakulata Msafiri

Mwanakwetukids

Neema alikuwa msichana mdogo mwenye umri wa miaka 8 aliyeishi na familia yake katika nyumba ndogo karibu na shuleni. Siku ya kuzaliwa kwake ilikuwa siku maalum lakini kwa miaka iliyopita hakuwa amewahi kusherehekea kikamilifu kwa sababu ya hali ya kifamilia. Mama yake alikuwa akifanya kazi ndogo ndogo ili kuhakikisha familia inapata chakula na mahitaji ya shule na mara nyingi hawakuwa na pesa za vitu vya ziada.

Siku ya kuzaliwa kwake mwaka huu mama yake alitoka sokoni akiwa na keki ndogo iliyojaa rangi na mapambo mazuri ya sukari. Neema aliposikia wito wa mama yake macho yake yakaangaza kwa furaha. "Ni siku yangu!" alisema kwa kicheko kilichojaa shangwe.

Neema aliamua kuwaita marafiki zake wote wa shule. Wote walikusanyika nyumbani kwa Neema wakiwa wamevaa vizuri wakiimba wimbo wa siku ya kuzaliwa. Kila mmoja alishiriki keki kucheka na kushirikiana michezo midogo ya kufurahisha. Neema aliona tabasamu kila upande akajua kuwa furaha kweli huzaa zaidi unaposhirikiana na wengine.

Wakati mama yake alimkumbatiabNeema alijisikia moyo wake umejaa upendo. “Mama hii ndiyo siku nzuri zaidi maisha yangu!” alisema Neema. Mama yake alimkumbatia kwa shangwe na kusema “Furaha tunayoshirikiana ni furaha ya kweli mpendwa wangu.”

Usiku ule Neema alilala akiwa na tabasamu kubwa usoni akijua kuwa siku nzuri haifutiki haraka. Kila kicheko, kila wimbo na kila kipande cha keki kilikuwa kumbukumbu ya furaha isiyosahaulika. Aliapa kuwa siku zote atajitahidi kushirikiana na wengine kwani tabasamu na shangwe ya pamoja ni hazina isiyopimika.

emakulatemsafiri@gmail.com

0653903872