NDOTO ZA WATOTO ZINAVYOVUNJWA NA MIGOGORO YA WAZAZI

Emakulata Msafiri

Mwanakwetukids

Migogoro ya wazazi ni hali ya kutokuelewana au mabishano yanayotokea kati ya baba na mama katika familia. Migogoro hiyo inaweza kuwa ya mara kwa mara au ya muda mfupi. Ingawa wazazi ndio wahusika wakuu wa migogoro hiyo watoto nao huathirika kwa kiasi kikubwa. Hivyo migogoro ya wazazi ina athari mbalimbali kwa watoto kiakili, kihisia na kijamii.

Migogoro ya wazazi husababisha watoto kuwa na msongo wa mawazo. Watoto wanapoona wazazi wao wakigombana mara kwa mara huishi kwa hofu na wasiwasi. Hali hii inaweza kuathiri afya yao ya akili na kuwafanya washindwe kuzingatia masomo au shughuli nyingine muhimu.

Pia migogoro ya wazazi huathiri maendeleo ya kielimu ya watoto. Kutokana na mawazo mengi na mazingira yasiyo na utulivu nyumbani watoto wanaweza kushindwa kufanya vizuri shuleni. Wengine hupoteza hamasa ya kusoma na hata kushuka kitaaluma.

Aidha migogoro ya wazazi inaweza kusababisha watoto kuwa na tabia zisizofaa. Baadhi yao huiga ugomvi wanaouona nyumbani na kutumia vurugu au lugha mbaya wanaposhughulika na wenzao. Hali hii inaweza kuharibu mahusiano yao na watu wengine katika jamii.

Vilevile migogoro mikubwa inaweza kusababisha kuvunjika kwa familia kupitia talaka au kutengana kwa wazazi. Hali hii huweza kuwafanya watoto kukosa malezi bora na upendo wa wazazi wote wawili jambo ambalo huathiri ukuaji wao wa kimwili na kihisia.

Hata hivyo migogoro inaposhughulikiwa kwa hekima na mazungumzo ya amani watoto wanaweza kujifunza namna ya kutatua tofauti kwa njia nzuri. Hivyo wazazi wanapaswa kuwa makini katika kushughulikia migogoro yao ili kulinda ustawi wa watoto.

 

 

emakulatemsafiri@gmail.com

0653903872