JE! MILA ZA KUBALEHE BADO ZINAFAA KATIKA DUNIA YA LEO?

Emakulata Msafiri

Mwanakwetukids

Mila ni utamaduni unaorithishwa kutoka kizazi kimoja kwenda kingine. Katika jamii nyingi za Afrika mila zilikuwa njia ya kufundisha vijana maadili, heshima na majukumu ya maisha. Katika jamii ya Wamakonde mila za kubalehe zilikuwa sehemu muhimu ya malezi ya watoto wakati wa kuingia utu uzimani.

Katika kipindi cha kubalehe wavulana na wasichana walipewa mafunzo maalumu kuhusu tabia njema, kazi za nyumbani, heshima kwa wazazi na namna ya kuishi katika jamii. Wasichana walifundishwa kuwa na nidhamu, kujitunza na kuheshimu familia huku wavulana wakifundishwa uwajibikaji, ujasiri na kufanya kazi kwa bidii. Mafunzo haya yalitolewa na wazee wenye uzoefu mkubwa katika jamii.

Mila hizi zilisaidia kuwaandaa vijana kwa maisha ya baadaye. Vijana walijifunza umuhimu wa umoja, mshikamano na kuheshimiana. Pia walifundishwa namna ya kutatua matatizo na kuishi kwa amani na watu wengine. Kutokana na mafunzo hayo jamii iliweza kuwa na vijana wenye maadili mema na heshima.

Hata hivyo kadiri dunia inavyobadilika baadhi ya mila zimeanza kuangaliwa kwa mtazamo mpya. Serikali na wataalamu wa afya wanasisitiza kuwa mila yoyote inayoweza kuleta madhara kwa mtoto haifai kuendelea. Hivyo jamii nyingi zimeendelea kuhifadhi mila nzuri zinazofundisha maadili huku zikiepuka vitendo vinavyoweza kuhatarisha afya au haki za watoto.

Kwa ujumla mila za kubalehe katika jamii ya Wamakonde zilikuwa na lengo la kuwalea vijana na kuwaandaa kwa maisha ya utu uzima. Mila hizo zilisaidia kujenga maadili na mshikamano katika jamii. Hata hivyo ni muhimu kuhakikisha kuwa mila zinazodumishwa leo zinazingatia usalama, afya na haki za watoto.

emakulatemsafiri@gmail.com

0653903872