Emakulata Msafiri
Mwanakwetukids
Kulikuwa na kijiji kidogo kilichoitwa Ndoto. Kijiji hicho kilikuwa cha ajabu kwa sababu kila mtu alikuwa akilala mapema sana na hawakuwa wakiamka mapema kama kawaida.
Lakini kulikuwa na kitu cha kushangaza zaidi kila asubuhi watu walikuwa wakisahau baadhi ya mambo ya siku iliyopita kana kwamba muda ulikuwa unafutika.Katika kijiji hicho aliishi mvulana mmoja aitwaye Ayo. Ayo alikuwa tofauti na wengine alikuwa akiamka mapema na alipenda kuchunguza mambo.Siku moja alipokuwa akicheza karibu na kilima aliona mwanga mdogo ukitoka chini ya ardhi. Alipokaribia alikuta jiwe kubwa lenye michoro ya ajabu.
Alipoligusa ghafla ardhi ilifunguka kidogo na sauti ya chini ikasema “Kijiji chenu kimefungwa katika usingizi wa muda.”Ayo alishtuka "Usingizi wa muda?!”
Sauti ikaendelea “Ni laana ndogo kuna saa ya kale iliyofichwa ndani ya mnara wa zamani. Ndiyo inayodhibiti kumbukumbu za kijiji chenu.” Ayo aliamua kuokoa kijiji chake. Usiku ule alipolala hakuweza kupata usingizi. Alingoja mpaka kila mtu alipolala kisha akaanza safari yake kwenda kwenye mnara wa zamani uliokuwa mbali. Njiani kulikuwa na giza kubwa sana na sauti za ajabu. Lakini Ayo aliendelea mbele kwa ujasiri.
Alipofika kwenye mnara mlango ulikuwa umefungwa kwa kufuli la chuma. Lakini juu yake kulikuwa na maandishi “Funguo ni maarifa si nguvu.”Ayo alifikiria hakukuwa na ufunguo wa kawaida.Alikumbuka maneno ya jiwe “maarifa…”
Akaanza kuchunguza mnara kwa makini. Aligundua mifumo ya michoro iliyokuwa inafanana na nyota na miezi. Baada ya muda alitambua muundo ilikuwa ni mfuatano wa nyota unaolingana na majira ya mwaka. Alipoweka alama sahihi kwa kutumia mawe madogo ghafla mlango ukafunguka.
Ndani kulikuwa na saa kubwa ya zamani iliyokuwa ikizunguka polepole kinyume na kawaida.“Saa ya kumbukumbu…” Ayo alinong’ona.Alipoigusa sauti ilisikika tena “Kama unataka kuokoa kijiji lazima uirudishe muda wake wa kawaida.”Ayo alikumbuka kwamba kila kitu kilikuwa kimepotoshwa kwa sababu ya mzunguko huo.Aligeuza mikono ya saa kwa makini. Ghafla upepo mkali ulivuma na mwanga mkubwa ukalijaza mnara. Asubuhi iliyofuata Ayo aliamka kijijini kwake. Lakini safari hii kitu kilikuwa tofauti.Watu walikumbuka kila kitu Walizungumza kuhusu jana, juzi na wiki iliyopita kama kawaida.Kijiji kilikuwa kimepona.Lakini hakuna aliyemkumbuka Ayo kuwa ameenda kwenye mnara.
Ayo alitabasamu tu. Alijua ukweli hata kama wengine hawakujua. Siku moja jiwe lile lilionekana tena na kusema kwa sauti ya mbali“Umeokoa kijiji bila kutarajia sifa. Hiyo ndiyo nguvu ya kweli.” Kisha likatoweka.
emakulatemsafiri@gmail.com
0653903872
Post a Comment