MTI WA KILIO

 

Na, Emakulata Msafiri

Kulikuwa na mti mkubwa sana uliokuwa katikati ya msitu huo. Mti huo ulikuwa na matawi marefu yaliyopinda kama mikono ya binadamu, na kila usiku, wenyeji walidai kusikia sauti ya mtoto akilia kutoka kwenye mti huo. Waliuita Mti wa Kilio.

Wazee wa kijiji walisema miaka mingi iliyopita, mtoto mmoja aitwaye Amina alipotea alipokuwa akicheza karibu na mti huo. Tangu siku hiyo, hakuna aliyewahi kumwona tena. Lakini kila usiku, baada ya saa mbili usiku, kilisikika kilio cha mtoto kutoka kwenye mti huo. Wengine walisema waliwahi kuona kivuli cheupe kikizunguka mti huo usiku wa manane.

Watoto walikatazwa kabisa kukaribia mti huo, lakini siku moja, kijana mmoja shujaa aitwaye Musa aliamua kwenda kuchunguza mwenyewe. Alijificha usiku na kuingia msituni peke yake akiwa na tochi na biskuti za kutoa kama sadaka.

Alipofika karibu na mti, upepo mkali ulianza kuvuma, na matawi yakaanza kucheza kana kwamba mti huo ulikuwa hai. Ghafla, Musa alisikia sauti ya mtoto ikilia, "Naogopa... naogopa..."

Musa alipiga moyo konde na kuuliza, “Wewe ni nani?”

Sauti ikamjibu, “Mimi ni Amina... nimekwama hapa kwa miaka mingi. Nisaidie...”

Musa alitoa biskuti na kuziweka chini ya mti. Ghafla, upepo ulisimama. Kulikuwa na kimya kizito. Mti ulitikisika kisha ukatoa mwanga mweupe. Kivuli cha mtoto kilionekana kikitoka kwenye mti na kusema, “Asante, Musa. Umenikumbuka.”

Tangu siku hiyo, kilio kilikoma, na mti haukusikika tena usiku. Lakini kila mwaka tarehe aliyopotea Amina, maua meupe huota chini ya mti huo, na ndege huimba nyimbo za huzuni.

emakulatemsafiri@gmail.com

0653903872