UMUHIMU WA KUSAFISHA MIKONO KWA WATOTO

 

Na, Emakulata Msafiri

Mikono ni sehemu muhimu sana ya miili yetu. Kwa kutumia mikono, tunaweza kufanya kazi nyingi kama vile kula, kuandika, kushika vitu na hata kucheza. Hata hivyo, mikono inaweza kuwa chanzo cha maradhi iwapo haitasafishwa ipasavyo.

Kusafisha mikono ni jambo la msingi katika kulinda afya yetu. Mikono isiposafishwa, inaweza kubeba vijidudu kama vile bakteria na virusi. Vijidudu hivi vinaweza kuingia mwilini kupitia mdomo, pua au macho na kusababisha magonjwa kama vile kuhara, mafua na homa ya mapafu. Hali hii inaweza kupelekea mtu kulazwa hospitalini au hata kupoteza maisha.

Wakati wa kusafisha mikono ni muhimu sana. Lazima tusafishe mikono kabla ya kula au kushika chakula, baada ya kutoka chooni, baada ya kukohoa au kupiga chafya, na baada ya kushika vitu vichafu. Kusafisha mikono kunapaswa kufanywa kwa kutumia maji safi na sabuni, huku tukihakikisha kuwa tunasugua kila sehemu ya mkono kwa muda wa angalau sekunde ishirini.

Faida za kusafisha mikono ni nyingi. Kwanza, tunajikinga na magonjwa. Pili, tunawalinda watu wengine walioko karibu nasi. Tatu, tunasaidia jamii yetu kuwa na afya bora, jambo ambalo huwezesha watoto kuhudhuria masomo bila kuumwa, na watu wazima kufanya kazi zao kwa ufanisi.

Kwa kumalizia, kusafisha mikono ni tabia ndogo lakini yenye athari kubwa katika maisha yetu. Kila mtoto anapaswa kujifunza na kuzingatia kusafisha mikono kila wakati unaofaa. Mikono safi ni siri ya afya njema na maisha yenye furaha.

emakulatemsafiri@gmail.com

0653903872